ATR telekanalınıñ mühbiri Şevket Namatullayev, onıñ sözlerine köre, Rusiyege boysunğan Qırım İçki siyaset nazirligi adından yarımada şeerleriniñ memuriyetlerine yollanılğan vesiqanı paylaştı. Vesiqada Ukraina qıtaiy qısmına Herson vilâyetindeki memuriy sıñırdan keçip ketken Qırım sakinleri içün «yüksek seviyede telüke» bar olğanı aqqında aytıla.
Vesiqada «ukrain keçirüv noqtalarında sanki qırımtatar ekstremistleriniñ tesir saasınıñ keñleşkeninen» bağlı telüke aqqında söz yürsetile.
Bundan sebep, Qırım sakinlerine Ukrainağa memuriy sıñırdan keçip barmaqtan vazgeçmege tevsiye etile. Vesiqada bu aqta yarımada sakinlerine haber berilmesi kerekligi qayd etile.
«Rayon ve şeerlerniñ yolbaşçıları bu malümatnı müessiseler reberlerine endi yollay, olar hadimlerne añlatsın dep», – dep izaat berdi Namatullayev.
Qırım 2014 senesi Rusiye tarafından işğal etilgen soñ qıtaiy Ukraina ve yarımada arasında resmiy olaraq memuriy, aqiqaten ise, kerçek «sıñır» yerleşti. Memuriy sıñırda üç kiriş/çıqış nezaret noqtası çalışa: «Kalançak», «Çonğar» ve «Çaplinka».
Ukraina Yuqarı Radası Rusiyeniñ vaqtınca Qırım işğaliniñ başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.
