İyün 1-de Aqmescit şeeriniñ bir qısmı büyük qaza neticesinde suvsız qaldı.
Bu aqta «Qırım suvı» («Voda Krıma») Devlet unitar müessisesiniñ matbuat hızmeti bildire.
«Gece Aqmescit şeeriniñ büyük qısmını suvnen temin etken merkeziy magistral suv ağında (Moskoltso ve Verhnâya Ukrainka rayonı) büyük qaza yüz berdi. Şimdiki vaqıtta tamir işleri alıp barıla», – dep aytıla müessiseniñ beyanatında.
Müessisede suvnen teminlemesini çarşenbe künü saat 15:00-ke qadar tüzetmege vade eteler.
Ukraina Yuqarı Radası Rusiyeniñ vaqtınca Qırım işğaliniñ başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.
