Link açıqlığı

Qırım Muhtar Cumhuriyeti prokuraturası Qırımda Mumine Aliyevanıñ öldürilmesini taqiq ete


Mumine Aliyeva

Qırım Muhtar Cumhuriyeti prokuraturası Rusiye tarafından işğal etilgen Qırımnıñ İslâm-Terek rayonı sakini Mumine Aliyevanıñ öldürilmesini taqiq ete. Bu aqta müessiseniñ matbuat hızmeti bildire.

«29.05.2016 s. Eski Qırım şeerinde, Qırım yarımadası territoriyasında, Tamğacı (İzümovka) köyü sakini Mumine Aliyevanıñ zorbalıq izlerinen cesedi tapıldı... Muhtariyet prokuraturası bu vaqia boyunca malümat Mahkemeden aldın taqiqatnıñ yekâne cedveline kirsetti ve Ukraina Cinaiy kodeksiniñ 115 maddesi 1-ci qısmında qayd etilgen cinayet (aselet yapılğan öldürüv) alâmetleri boyunca mahkemeden aldın taqiqatnı başladı», – dep aytıla beyanatta.

İşbu madde boyunca ceza olaraq 7-den 15-ke qadar yılğa apiske qapatılması közde tutula.

36 yaşındaki Mumine Aliyevanıñ cesedi zorbalıq izlerinen mayıs 29-da ormanda tapıldı.

Rusiyege boysunğan İçki işler nazirliginiñ Qırım baş komitetiniñ matbuat hızmetinde bildirilgenine köre, mayıs 30-da cinayet yapqanında şeklenilgen kişi yaqalandı. Bu, 30 yaşındaki İslâm-Terek rayonınıñ sakini oldı, o qabaatnı boynuna alğanı aqqında ariza yazdı ve yaş qadınnı öz avtomobiline mayıs 29-da aqşam cemaat naqliye turağında alğanını añlattı. Qadınnıñ cenazesine Tamğacı köyüne yüzlerce vatandaşlar keldi.

Meclis reisi Refat Çubarovnıñ sözlerine köre, yüz bergen vaqia «Qırımda qırımtatarlarğa qarşı yapılğan nevbetteki cinayettir».

Ukraina Yuqarı Radası Rusiyeniñ vaqtınca Qırım işğaliniñ başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti.

XS
SM
MD
LG