Mayıs 31-de, salı künü Facebookta Qırımtatar Milliy Meclisiniñ reisi Refat Çubarovnıñ adına qayd etilgen bir sıra aynı saifeler peyda oldı. Qırım.Aqiqat elde etken malümatqa köre, aqşam içtimaiy ağda tahminen 10 dane böyle saife qayd etildi.
Ukraina halq deputatı Refat Çubarovnıñ mesleat yardımcısı Tatyana Tereşenko Qırım.Aqiqatqa bergen izaatında şimdiki vaqıtta tek bir dane resmiy saife bar olğanını qayd etti. Onıñ bildirgenine köre, mayıs 31 ve iyün 1 künleri Meclis reisi işğal etilgen Qırımda insan aqları meselesini muzakere etmek maqsadınen Almaniya paytahtı Berlinde buluna.
«Onıñ ne qadar çoq işi bar olğanını köz ögüne alsaq, Refat Abdurahmanoviçniñ içtimaiy ağlarda qoşma saifelerni qayd etmege vaqtı, em de kerekligi ve istegi olacağına şübelenem. Onıñ yekâne qullanğan saifesi bar. Qalğanı, büyük ihtimalde, feyktir», – dep ayttı Tatyana Tereşenko.
Refat Çubarov Almaniya paytahtında eki kün iş ziyaretinen buluna. Ziyaret çerçivesinde o, Almaniya federal kantsleri ofisiniñ temsilcileri ile Rusiye tarafından işğal etilgen Qırımda insan aqları vaziyetini muzakere etmege planlaştıra.
Ukraina Yuqarı Radası Rusiyeniñ vaqtınca Qırım işğaliniñ başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.
