Link açıqlığı

Avito rusiyeli internet portalınıñ analitikleri Qırım şeerlerinde bir kün ev kirası saasında tekliflerniñ eksilmesini ve kurort şeerlerinde isteklerniñ yükselmesini qayd ete. Bunı saytta bildirilgen tedqiqat malümatları tasdıqlay.

«Aqyarda bir künlük kira aqqında beyanatlarnıñ sayısı 12 fayızğa, Yaltada 18 fayızğa eksildi», – dep qayd eteler sayt mütehassısları.

Bunen beraber, Aqyar ve Yaltada kira fiyatı bir yıl içinde 2-4%-ğa arttı, böyle etip, bir kün kirasınıñ orta fiyatı Yaltada 2015 senesi 2 293 rubleni teşkil etti, aynı bu vaqıtta 2016 senesi 2 347 rublege qadar arttı. Aqyarda bu fiyat 2015 senesi 1 805 rubleni teşkil etti, 2016 senesi 1 859 rublege arttı.

Krımstat esabatına köre, Qırımda yañı qurulğan evde bir kvadrat metrniñ fiyatı aman-aman 47 biñ rublege yetti. Bunen beraber, bir kvadrat metrniñ fiyatı 2016 senesiniñ birinci üç ayında, keçken senege baqqanda, 5,7%-ğa arttı. Qırım rieltorları, öz nevbetinde, 2014 senesine köre, yarımadada taşınmaz mallarğa istekniñ eksilgenini qayd ete. 2016 senesi Qırımda qullanılğan ev fiyatları, 2014 senesine köre, 30 – 40 fayızğa eksildi.

Qırımdan köçkenler öz evlerini satıp olamağanlarını, ya da bedava sata bilgenlerini sıq ayta.

Ukraina Yuqarı Radası Rusiyeniñ vaqtınca Qırım işğaliniñ başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.

XS
SM
MD
LG