Aqyarda insan aqları boyunca vekâletli Pavel Butsay sürgün etilgen vatandaşlarğa bedava topraq ayırmasını talap ete. Bu aqta o Kremlge boysunğan Aqyar parlamentiniñ nevbetteki sessiyasında ilân etti, dep bildire Qırım.Aqiqat mühbiri.
Mayıs 31-de Aqyar parlamentariyleri «Aqyar şeeri mülkiyetindeki topraq damartılarını vatandaşlarnıñ mülkiyetine bedava berüv aqqında» şeer qanunınıñ leyhasını baqıp çıqtı. Qanun leyhasınıñ teşebbüsçisi Moskvağa boysunğan şeer akimiyeti ve şahsen mülk ve topraq meseleleri boyunca bölükniñ reisi Aleksandr Sveçnikov adından bildirildi.
Onıñ sözlerine binaen, qanun qabul etilgen soñ topraq damartıları bedava ayırılacaq vatandaşlarnıñ içtimaiy kategoriyalarınıñ cedveli tizilecek. Qanun munaqaşalarğa yol berdi.
Hususan, Aqyar ombudsmeni Pavel Butsaynıñ ilân etkenine köre, vekâletliniñ apparatında qanun leyhasını işlep çıqqanda olar, yuqarıda qayd etilgen cedvelge Qırım territoriyasından sürgün etilgen vatandaşlarnı kirsetmek kerek olğanı aqqında netice çıqardılar.
«Bedava topraq ayırılacaq vatandaşlarnıñ cedveline siyasiy repressiyalarğa oğrağan ve bundan soñ reabilitatsiyadan keçken şahıslarnı, bundan da ğayrı, Qırımdan sürgün etilgen şahıslarnı kirsetmege rica etem», – dep ilân etti Butsay.
Qanun leyhası birinci oquvda bir ağızdan qabul etildi. Tüzetmeler kirsetilecek müddeti iyün 25-ke qadar devam etecegi belgilendi.
Ukraina Yuqarı Radası Rusiyeniñ vaqtınca Qırım işğaliniñ başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.
