Link açıqlığı

Rusiye prezidenti Vladimir Putin Aqyar şerefli vatandaşı oldı, böyle qarar Kremlge boysunğan Aqyar parlamentiniñ deputatları mayıs 31-de keçirilgen nevbetteki sessiyada qabul ettiler.

Qırım.Aqiqat mühbiriniñ bildirgenine köre, qarar leyhası parlament spikeri vazifesini vaqtınca eda etken Yekaterina Altabayeva tarafından kirsetildi.

Resmiy beyanatqa köre, Rusiye prezidentine fahriy unvan «Aqyar şeeri ve Rusiye Federatsiyası içün yapqan yararlıqları içün» berildi.

Altabayeva minberden Vladimir Putinniñ Aqyar içün yapqan tahminen on dane yararlıqnı ilân etti, bu cümleden onıñ «demokratiya ve insan aqlarını qorçalav saasında alıp barğan faaliyeti» da qayd etildi.

«Bellesem, Rusiye Federatsiyasına qaytqanımız bizim inkişafımıznı ve yahşı yaşayşımıznı teminledi. Bellesem, bu yerde bulunğanlardan ve Aqyar sakinlerinden iç kimseniñ şübesi yoq ki, mesele böyle çezilmese edi, Qırım ve Aqyarnıñ taqdiri Ukraina cenübiy şarqında kibi facialı ola bilir edi», – dep ayttı Altabayeva.

Putinge şerefli vatandaş unvanı berilmesiniñ daa bir sebebi Aqyarnıñ rolü ve itibarı Rusiyede ve tış memleketlerde daa yüksek olğanı oldı.

Vladimir Putinge Aqyar şerefli vatandaşı unvanını berüv qararı içün bir ağızdan 21 deputat rey berdi.

Ukraina Yuqarı Radası Rusiyeniñ vaqtınca Qırım işğaliniñ başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.

XS
SM
MD
LG