Link açıqlığı

OSCE Kütleviy haber vastaları boyunca vekâletli Dunâ Miyatoviçniñ ofisi Qırımda mühbirler aqları boyunca mahsus missiyanı teşkil etmek içün faaliyetni başlamağa qarar aldı. Böyle qarar Viyana şeerinde keçirilgen Ukraina Mustaqil media zenaat birligi (UMMZB), Ukraina Milliy mühbirler birligi (UMMB) ve Rusiye Mühbirler birliginiñ reberleriniñ körüşüvinde qabul etildi.

UMMZB reisi Yuriy Lukanovnıñ Qırım.Aqiqatqa bildirgen malümatına köre, missiyada iştirak etmesi içün Halqara mühbirler federatsiyası ve diger halqara media teşkilâtları davet etilecektir.

Dunâ Miyatoviçniñ sözlerine binaen, missiya Qırımda çoq meselelerni, bu cümleden logistika meselesini çezmek kerek olur. Körüşüv iştirakçileri missiya teşkil etilmesi ceryanında daimiy şekilde mesleat keçirmege añlaştı, dep qayd ettiler Ukraina Mustaqil media zenaat birliginiñ matbuat hızmetinde.

Dunâ Miyatoviç iyül ayında bar olğan meselelerni muzakere etmek içün Kiyevge kelip, UMMZB ve UMMB faallerinen körüşüv keçirmege planlaştıra, dep bildirdiler Ukraina Mustaqil media zenaat birliginde.

Halqara mühbirler federatsiyasınıñ baş kâtibiniñ muavini Jeremi Diarnıñ aytqanında köre, federatsiya «Qırımda mühbir aqlarınen bağlı meselelerni çezmek içün böyle missiyanıñ teşkil etilmesinen pek meraqlana».

UMMZB reisi Yuriy Lukanov Qırım.Aqiqatqa ayttı ki, böyle teşebbüsni o, Avropa mühbirleri federatsiyasınıñ Sarayevoda keçirilgen toplaşuvında eki ukrain mühbirler teşkilâtı, yani UMMZB ve UMMB adından bildirdi.

«Missiyanı teşkil etmek içün işlerniñ başlanması daa ğalebe degildir. Missiya, bu qullanılacaq ya da qullanılmaycaq bir alettir. Biz, Qırım mühbirlerinen beraber, bunıñ muvafaqiyetli olması içün elimizden kelgenini yapmaq kerekmiz», – dedi Yuriy Lukanov.

Bundan da ğayrı, Lukanovnıñ sözlerine köre, missiyanıñ teşkil etilmesine Kiyevge kelgen Qırım mühbirlerini celp etmek kerektir.

Rusiye tarafından işğal etilgen Qırımda yerli mühbirlerge qarşı yapılğan repressiyalar aqqında Bütün dünya Matbuat azatlığı kününe bağışlanıp Helsinkide (Felemenk) keçirilgen UNESCO konferentsiyası çerçivesindeki merasimlerde haber etildi.

2014 senesinden başlap rusiyeli ve Rusiyege boysunğan Qırım ükümeti mustaqil mühbirlerge basqın ete, mustaqil kütleviy haber vastalarınıñ faaliyetine mania ola, mühbirlerge qarşı cinaiy işler aça.

Ukraina ve halqara uquq qoruyıcı teşkilâtlar diamiy şekilde yarımadağa halqara nezaretçilerni kirsetmege rica ete edi.

Ukraina Yuqarı Radası Rusiyeniñ vaqtınca Qırım işğaliniñ başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.

XS
SM
MD
LG