Qırımda Aqmescitteki aylanma yol omravı neticesinde 6 insan elâk olğan vaqia boyunca qabaatlanğanlarğa qarşı cinaiy iş qapatıldı. Bu aqta «RİA novosti» («RİA haberler») agentligi, Kremlge boysunğan Qırım Taqiqat komitetiniñ matbuat hızmetiniñ malümatına esaslanıp, bildire.
«Taqiqat bir sıra taqiq faaliyetini alıp bardı, qabaatlanğanlarnıñ cinayetke bağlı olğanını isbatlağan deliller toplandı. Lâkin, olardan şefaat (resmiy rica) kelgeni sebebinden ve Ğalebeniñ 70 yıllığına bağışlanğan amnistiya aktı çıqarılğanı sebebinden, taqiqat cinaiy işni qapatmaq qararını aldı», – dep aytıla beyanatta.
Qırım Taqiqat komitetiniñ resmiy saytında cinaiy iş qapatılması aqqında malümat bildirilmey.
2015 senesi politsiya Aqmescit-Dubki yolunıñ omravı neticesinde 6 insan elâk olğanına bağlı sayılğan «Bağçasaray yol quruvı idaresi» şirketi bölüginiñ müdiri, baş müendisi ve ustasına qabaatlavnı taqdim etti.
2014 senesi sentâbr 28-de içinde 8 insan bulunğan avtomobil yolda 9 metrlik çuqurğa tüşti. Çuqur yolnıñ bu qısmında yol örtüsi omrağanı neticesinde peyda oldı. Yol qazası neticesinde eki bala yaralarnen hastahanege alıp ketirildi, qalğan altı insan, bu cümleden eki bala, elâk oldı.
Omrav, tübünde demiryol tünneli keçken yol qısmında yüz berdi. Yol quruvınıñ baş yapıcısı (podrâdçik) «Yujdorstroy» şirketi edi. «Krımavtodor» şirketi ise, yol baqımı içün mesüliyetli edi.
Ukraina Yuqarı Radası Rusiyeniñ vaqtınca Qırım işğaliniñ başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.
