Link açıqlığı

Saatnıñ esas haberi

Qırımda öldürilgen qadınnıñ cenazesine yüzlerce insanlar keldi – Nariman Celâl


Rusiye tarafından işğal etilgen Qırımda bazarertesi künü tünevin öldürilgen Mumine Aliyevanı kömeler. İslâm-Terek rayonınıñ Tamğacı (İzümovka) köyüne yüzlerce insanlar keldi. Bu aqta Qırımtatar Milliy Meclisi reisiniñ birinci muavini Nariman Celâl Facebook saifesinde yazdı.

«Yaqında Mumine Aliyevanıñ cenazesi başlanacaq. Onıñ qorantasınıñ evine barıp çıqmaq içün yüzlerce vatandaşlarımızdan keçmek kerek oldı», – qayd etti Celâl.

Bundan evel Meclis reisi Refat Çubarov vatandaşlarnı Mumine Aliyevanıñ qorantasına destek köstermege çağırdı.

Onıñ sözlerine köre, yüz bergen vaqia «Qırımda qırımtatarlarğa qarşı yapılğan nevbetteki cinayettir».

Qırım Müftiyatı da öldürilgen qadınnıñ soy-soplarına taziye bildirdi.

Rusiyege boysunğan İçki işler nazirliginiñ Qırım baş komitetiniñ matbuat hızmetinde bildirilgenine köre, mayıs 30-da cinayet yapqanında şeklenilgen kişi yaqalandı. Bu, 30 yaşındaki İslâm-Terek rayonınıñ sakini oldı, o qabaatnı boynuna alğanı aqqında ariza yazdı ve yaş qadınnı öz avtomobiline mayıs 29-da aqşam cemaat naqliye turağında alğanını añlattı.

36 yaşındaki Mumine Aliyevanıñ cesedi zorbalıq izlerinen mayıs 29-da ormanda tapıldı.

Qırımdaki Taqiqat komiteti bu vaqia boyunca cinaiy iş açtı.

Ukraina Yuqarı Radası Rusiyeniñ vaqtınca Qırım işğaliniñ başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.

XS
SM
MD
LG