Qırımtatar Milliy Meclisiniñ reisi Refat Çubarov mayıs 30-da Kiyevde «Qırımnıñ kelecegi» halqara yaşlar forumınıñ açılışında bu merasimde iştirak etken gençler bütün qırımtatar halqınıñ maqsatlarına irişmek içün yardım etecegini ilân etti, dep bildire Qırım.Aqiqat mühbiri.
«Bu körüşüvniñ maqsadı qırımtatar halqınıñ maqsatlarına irişmek, vazifelerini ömürge keçirmek içün qırımtatar yaşlarınıñ imkânlarını birleştirmektir. Eminim ki, çalışacağıñız bu eki kün devamında işbirlik, diger devletlerdeki qırımtatar diasporaları ile işbirlik meselelerini muzakere eteceksiñiz», – dep qayd etti Çubarov.
Forum programması podium muzakereleri ve iştirakçilerniñ gruppalarda çalışmalarından ibaret.
Forumda çıqışta bulunacaqlar arasında qırımtatar halqınıñ lideri Mustafa Cemilev, mühbir Sevgil Musayeva-Borovik, «Qırım SOS» cemaat teşebbüsi idarecisiniñ muavini Alim Aliyev ve digerler qayd etile.
«Qırımnıñ kelecegi» halqara yaşlar forumı 31-ge qadar devam etecek. Forum idarecisi Gulnara Muratovanıñ bildirgenine köre, teşkilâtçılar tahminen 400 ariza aldı, olardan Ukraina ve tış ülkelerdeki qırımtatar diasporalarından 18-35 yaşındaki tahminen 200 iştirakçi saylandı. Forumğa Türkiye, Poloniya, Romaniya, Litvaniya ve Almaniyadan temsilciler kelecek.
Qırım Rusiye tarafından işğal etilgen soñ qıtaiy Ukrainağa biñlerce insanlar köçip ketti. Mecliste tahminen 35 biñ qırımtatar kişi aqqında aytalar, olar yarımadanı terk etmege mecbur oldılar.
Ukraina Yuqarı Radası Rusiyeniñ vaqtınca Qırım işğaliniñ başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.
