Link açıqlığı

Qırım ormanında öldürilgen yaş qadınnıñ cesedi tapıldı


Mayıs 29-da Qırımda, Eski Qırım (Starıy Krım) şeeri yanındaki ormanda zorbalıqnen öldürilgen yaş qadınnıñ cesedi tapıldı.

Bu aqta Rusiyege boysunğan İçki işler nazirliginiñ Qırım baş idaresiniñ matbuat hızmeti bildire.

Müessisede bildirilgenine köre, mayıs 29-da aqşam İçki işler nazirlginiñ İslâm-Terek rayonı boyunca bölüginiñ nevbetçi bölügine yerli sakinden onıñ 36 yaşındaki tatası ğayıp olğanı aqqında haber keldi. Elde etilgen malümatqa köre, yaş qadın evge qaytmadı, onıñ telefonında bağ bozuldı, onıñ bulunğan yeri belli degil edi. Qıdıruvlardan soñ qadınnıñ cesedi tapıldı.

«İçki işler bölüginiñ hadimleri cinayet yapqanında şeklenilgen kişini yaqaladı. Bu, 30 yaşındaki İslâm-Terek rayonınıñ sakini oldı, o qabaatnı boynuna alğanı aqqında ariza yazdı ve yaş qadınnı öz avtomobiline mayıs 29-da aqşam cemaat naqliye turağında alğanını añlattı. Bir sıra mahkeme ve tıbbiy ekspertizalarnıñ keçirilmesi belgilendi», – dep bildireler İçki işler nazirliginiñ baş idaresinde.

Bundan da ğayrı, Qırımda Taqiqat komiteti bu vaqia boyunca cinaiy iş açqanı aqqında qayd etile.

Qırımtatar Milliy Meclisiniñ reisi Refat Çubarov Facebook saifesinde öldürilgen qadın Tamğacı (İzümovka) köyüniñ sakini olğanını yazdı.

«Bilem ki, cenazege Qırımnıñ bütün köşelerinden çoq insan endi yol aldı. Öldürilgen Mumineniñ qorantası, anası ve eki ağası, maneviy ve maddiy destegimizge muhtac», – dep qayd etti Çubarov.

Onıñ bildirgenine köre, yüz bergen vaqia «Qırımda qırımtatarlarğa qarşı yapılğan nevbetteki cinayettir».

Ukraina Yuqarı Radası Rusiyeniñ vaqtınca Qırım işğaliniñ başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.

XS
SM
MD
LG