Rusiyege boysunğan Qırım ükümeti Birleşken Milletler Teşkilâtınıñ temsilcilerini yarımada qamaçavını teşkil etkenlernen er angi körüşüvlerden qaçınmağa ve olarğa halqara seviyede boykot ilân etmege çağırdı.
Bu aqta «RİA Krım» agentligine rusiyeli Qırım ükümetiniñ Milletlerara munasebetler devlet komitetiniñ yolbaşçısı Zaur Smirnov bildirdi.
«Birleşken Milletler Teşkilâtı kibi böyle nufuzlı halqara teşkilâtnıñ temsilcileriniñ Qırım yarımadasında yaşağan eki milliondan ziyade insannıñ ömrüni telükeli vaziyette qaldırğan ukrain ekstremistlernen körüşmesi mümkün degil. BMT temsilcilerini olarnen er angi körüşüvlerden vazgeçmege ve olarğa halqara seviyede boykot ilân etmege çağıramız», – dedi Smirnov.
Qırım qamaçavı aktsiyasınıñ idarecileri Smirnovnıñ beyanatı boyunca daa izaat bermedi.
2015 senesi sentâbr 20-de, Qırımğa mahsulat ve malnı alıp ketken yük naqliyeni blok etüv boyunca qırımtatarlarnıñ liderleri teşebbüsinen keçirilgen müddetsiz aktsiyası başlandı. 2016 senesi yanvar ayı ortasında, teşkilâtçılarnıñ sözlerine köre, Qırım qamaçavı boyunca aktsiyanıñ şekli deñişti.
Ukraina Yuqarı Radası Rusiyeniñ vaqtınca Qırım işğaliniñ başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.
