«Eurovision-2016» ğalibı, Qırımdan ukrain yırcısı Jamala «Golos krayini» («Memleketniñ sesi») ukrain istidat şounıñ yañı, yedinci, mevsiminiñ idmancısı olacaq.
Bu aqta şou alıp barıcısı Yekaterina Osadçaya leyhanıñ altıncı mevsiminiñ finalında yırcınıñ sanağa çıqışından soñ ilân etti. Bu malümatnı Jamala da tasdıqladı.
«Men kerçek seslerni sevem ve «Golos krayini» yarışında vaqıttan tış olğan tembrlerni qıdıracam. «Golos krayini» bu kelecekte yañı muzıka ve yañı sesler peyda olacaq bir şoudır. Er kesni leyhanıñ yedinci mevsim kastinglerine davet etem. Men qayğılı seslerni qıdıracam», – dedi Jamala sanada öz yırını yırlağan soñ.
Ukraina temsilcisi, Qırım yırcısı Jamala «Eurovision-2016» yır yarışında ğalebe qazandı, onıñ finalı İsveçiya paytahtı Stokgolm şeerinde mayıs 15-ke keçer gecesi keçirildi. Konkurs qaidelerine köre, kelecek sene Ukrainada «Eurovision» yarışı keçirilecektir.
Ukraina prezidenti Petro Poroşenko yırcığa «halq artisti» unvanını, Kiyev şeer yolbaşçısı Vitaliy Kliçko ise, oña «Kiyev fahriy sakini» unvanını berdi.
