Link açıqlığı

Rosavtodor iyün soñunda Keriç boğazında eki iş köprü olacağını vade ete


Keriç boğazında köpür temeliniñ qoyulması

Rosavtodor yolbaşçısı Roman Starovoyt Qırımğa köpür ve oña alıp barğan yollarnıñ qurulması aqqındaki operativ ştabınıñ toplaşuvında Keriç boğazında köpür qurulması boyunca alıp barılğan iş aqqında esabat berdi. Bu aqta Kremlge boysunğan Keriç memuriyetiniñ matbuat hızmeti bildire.

Onıñ sözlerine köre, iyün soñuna qadar ekinci ve üçünci iş köpürleri işke tüşürilecek. Starovoytnıñ bildirgenine köre, bu vaqtınca çalışacaq infrastruktura gemi keçüvi içün tayama qurulması boyunca işni başlamağa yardım etecek.

Roman Starovoytnıñ qayd etkenine köre, endi köpürniñ 20 tayaması azır, 25 kilometrni teşkil etken köpürge alıp barğan muvaqqat yollar qoyuldı. «Portovaya» demiryol stantsiyası yanında yük azbarınıñ quruluvı yekünlendi. Şimdiki vaqıtta azbar kün devamında 120 vagonnı idare ete.

Toplaşuvda Rusiye naqliye naziri Maksim Sokolovnıñ ilân etkenine köre, Krasnodar ve Qırım naqliye infrastrukturası Keriç boğazındaki köpür işke tüşürilmesine azır olmaq kerek.

Keriç boğazından köpür qurulmasınıñ kerekligi aqqında Putin ta 2014 senesi, işğalden soñ aytqan edi. Köpür leyhasınıñ baş podrâdçigi «Stroygazmontaj» şirketi oldı. Keriç boğazından keçecek köpürni 2018 senege qadar qurmağa vade etmekteler.

Ukraina Rusiyenen Keriç köprüniñ qurulışı ile bağlı añlaşmadan 2014 senesi, Rusiye Qırımnı işğal etken soñ çıqtı.

Ukraina Yuqarı Radası Rusiyeniñ vaqtınca Qırım işğaliniñ başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.

XS
SM
MD
LG