Eñ azdan 45 qaçaq elâk oldı, daa onlarca kişiler ğayıp oldı. Bu Aq deñizde olarnıñ rezina qayığı avdarılğan soñ oldı. Vaqia mayıs 27-de yüz berdi, dep bildire İtaliya yalı qaravullığı.
Cuma künü İtaliya arbiy deñiz flotunıñ «Vega» gemisi yalı qaravullarınen beraberlikte suvğa batayatqan qayıqtan tahminen 135 insannı qurtardı.
«Vega» gemisiniñ taqımı 45 elâk olğan kişini taptı, ve alâ daa qırıduv işlerini devam ete.
İtaliya yalı qaravullığınıñ bildirgenine köre, suvnıñ isinmesi ve deñizniñ tınç olğanı Avropağa Libiyadan kelmege tırışqan insanlar sayısınıñ artqanına sebep oldı.
Birleşken Milletler Teşkilâtı ve yalı qaravullığınıñ malümatına binaen, soñki afta devamında tahminen 14 000 kişi qayıqlardan tüşürildi, daa yüzlerce insanlar batqan ola bile, amma elâk olğanlar aqqında resmiy malümat bildirilmegen.
Deñizden keçip, Avropağa barıp yetmek içün qaçaqlar yüzlerce ya da biñlerce dollar töley, olarnıñ çoqusı yüzmege bilmey ve olarda qurtarıcı yelekleri olmay.
