Kremlge boysunğan Qırım ükümetiniñ temsilcileri Bulğaristanda ziyaretnen bulunğan vaqıtta yarımadanıñ turizm saasında imkânlarını taqdim ettiler. Bu aqta Qırım ükümetiniñ matbuat hızmeti bildire.
«Er istegen kişini yarımadanıñ unikal tabiatını ve çoq asırlı tarihını şahsen ögrenmek içün Qırımğa davet etem», – dedi Moskvağa boysunğan Qırım medeniyet nazirliginiñ reisi, eyet yolbaşçısı Arina Novoselskaya.
Arina Novoselskayanıñ qayd etkenine köre, «iç bir siyasiy manialarğa baqmadan, dostluq adetleri, işbirlikve asırlar devamında inkişaf etken Bulğaristan ve Rusiye halqları arasındaki ruhiy bağlar saqlanıp qalacaq».
Ziyaret çerçivesinde Rusiye medeniyet ve malümat merkezinde «Qırım ve Bulğaristannıñ işbirliginiñ imkânları ve kelecegi» mevzulı tögerek masa teşkil etildi. Bundan soñ Qırım Cumhuriyeti eyetiniñ azaları Bulğaristan Cumhuriyetindeki Rusiye Federatsiyasınıñ elçiliginde keçirilgen toplaşuvda iştirak etti, dep bildire Qırım ükümetiniñ matbuat hızmeti.
Ukraina Tışqı işler nazirligi Kremlge boysunğan Qırım ükümetiniñ temsilcileriniñ Bulğaristanğa ziyaretine izaat daa bermedi.
Ukraina Yuqarı Radası Rusiyeniñ vaqtınca Qırım işğaliniñ başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.
