Rusiye tarafından işğal etilgen Qırımdaki bala bağçasında terbiyeciler Oleg Gazmanovnıñ «Rossiya» («Rusiye») teşviqatçı yırınıñ refaqatında balalarğa qıldırğan saba gimnastikası videoğa çıqarıldı.
Bağçasaray bala bağçasında çıqarılğan video Youtube kanalında 2016 senesi mayıs 27-de peyda oldı.
Videoda bala bağçasınıñ ögündeki işareti yahşı körüne, işarette «Bağçasaray şeeriniñ belediye devlet mektepten aldın tasil müessisesi 8 sanlı «Gnözdışko» («Yuvaçıq») bala bağçası» dep yazılğan.
Gimnastika yapqanda balalar Gazmanovnıñ «Rossiya! Rossiya!» yırı refaqatında, terbiyeciniñ areketlerini tekrarlap, arbiycesine yüre, yumruqlarını töpege kötere.
Oleg Gazmanov Ukrainada non-grata şahısı sayılğan rusiyeli medeniyet erbapları cedveline kirsetilgen. Bunıñ sebebi, onıñ Rusiye ükümetiniñ Ukrainağa qarşı yapılğan basqıncılıqqa ve Qırım işğaline qol tutqanı oldı.
Ukraina Yuqarı Radası Rusiyeniñ vaqtınca Qırım işğaliniñ başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.
