Rusiye tarafından işğal etilgen Qırımda «Hizb ut-Tahrir» işi» boyunca dört yaqalanğan kişini Rostov-na-Donu şeerine yolladılar. Bu aqta Qırımtatar resurs merkezinde bildirdiler.
«Rostov-na-Donu şeerine Ferat Sayfullayev, Nuri (Yüriy) Primov, Rustem Vaitov, Ruslan Zeytullayevni alıp kettiler. 2015 senesi qışta olar Aqyar şeerinde yaqalandı», – dep aytıla beyanatta.
Bu mesele boyunca uquq qoruyıcılarnıñ resmiy beyanatları yoq.
Taqiqatnıñ noqta-i nazarına binaen, olar «Hizb ut-Tahrir» teşkilâtınıñ iştirakçileri ola. Aqyar musulmanları yaqalanğanından bir yıl soñra Qırımnıñ cenübiy tarafında da bu kibi vaqia yüz berdi. 2016 senesi fevral 11 ve 12 künleri rusiyeli uquq qoruyıcılar islâm dinini kütkenlerniñ evlerinde tintüv keçirdi ve insanlarnı yaqaladı. Umumen olaraq 14 adam yaqalandı.
«Hizb ut-Tahrir» – halqara islâm siyasiy firqasıdır. Onıñ resmiy maqsadı islâm devletini ve musulman yaşayış tarzını qurmaqtır. Bu teşkilât Rusiye, Qazahistan ve Almaniyada yasaq etildi; Ukraina ve diger memleketlerde onıñ faaliyeti qanun boyunca keçirile bile.
Ukraina Yuqarı Radası Rusiyeniñ vaqtınca Qırım işğaliniñ başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.
