Link açıqlığı

Saatnıñ esas haberi

Qırım Yuqarı mahkemesi Ahtem Çiygoznıñ apiste bulunma müddetiniñ uzattırılmasına qarşı şikâyet arizasını red etti – Smedlâyev


Ahtem Çiygoz
Ahtem Çiygoz

«Fevral 26 işi» boyunca qabaatlanğan Qırımtatar Milliy Meclisiniñ reis muavini Ahtem Çiygoznıñ apiste bulunma müddetiniñ uzattırılmasına qarşı şikâyet arizası qanaatlendirilmeyip qaldı. Böyle qararnı mayıs 27-de Rusiyege boysunğan Qırım Yuqarı mahkemesi qabul etti, dep bildire Qırımtatar Qurultayınıñ Merkeziy saylav komissiyasınıñ reisi Zair Smedlâyev Facebook saifesinde.

«Er vaqıt olğanı kibi, şikâyet arizası qanaatlendirilmeyip qaldı. Ahtem Çiygoz vatandaşlarımızğa, uquq qoruyıcılar tarafından hırsızlanğan Ervin İbragimovnı (mayıs 25-te Qırımda ğayıp oldı) azat etmeyceklerine qadar, şeñli merasimlerden vazgeçmege çağırdı», – dep yaza o.

Bundan evel aynı bu mahkeme Ahtem Çiygoznıñ apiste bulunma müddetini iyül 22-ge qadar uzattırdı.

Ahtem Çiygoz Aqmescit SİZO-sında 2015 senesi yanvar ayından başlap buluna.

Qırım Rusiye tarafından işğal etilgen soñ yarımadada Rusiye uquq qoruyıcıları Ukraina topraq bütünligine qoltutqan ve Qırımnıñ şimdiki yolbaşçısı Sergey Aksenov yolbaşçılığında «Rus birligi» firqasınıñ faallerine qarşı çıqqan qırımtatar faallerini mahkeme etmege başladılar.

Vaqialar 2014 senesi fevral 26-da olıp keçken edi. Rusiye taqiqatınıñ malümatına köre, yüz bergen çatışmada eki insan elâk oldı, 79 kişi zarar kördi.

Qırım Muhtar Cumhuriyeti prokuraturası 2016 senesi mayıs 17-de Qırım parlamentiniñ yanında 2014 senesi fevral 26-da keçirilgen barışıq toplaşuvına mania olması boyunca cinaiy iş açtı.

Ukraina Yuqarı Radası Rusiyeniñ vaqtınca Qırım işğaliniñ başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.

XS
SM
MD
LG