Link açıqlığı

G-7 («Büyük Yedi») devletleri Rusiyege qarşı onıñ Donbassta alıp barğan faaliyeti içün sanktsiyalarnı devam ettirmege añlaştı. Bu aqta İngiltere baş naziri Devid Kemeron Yaponiyada keçirilgen «Büyük Yedi» sammitiniñ neticeleri boyunca matbuat konferentsiyasında ilân etti, dep bildire Azatlıq Radiosı.

Devid Kemeronnıñ sözlerine köre, «Büyük Yedi» devletleriniñ liderleri sanktsiyalar Minsk añlaşmaları bütünley ömürge keçirilecegine qadar devam ettirilmek kerek olğanını saya.

Sammit beyanatında «Büyük Yedi» devletleri Qırımnıñ qanunsız işğalini takbih etkenleri ve Rusiyege yarımadanıñ qoşulması boyunca referendumnıñ neticelerini qabul etmeme siyasetini devam etecekleri aqqında bildirile.

«Büyük Yedi» liderleri Ukrainadaki davanıñ bütün taraflarını arbiy faaliyet alıp barılğan territoriyada ateşniñ toqtatılmasına ketirecek konkret areketler yapmağa çağırdı.

Bundan evel Avropa Şurasınıñ reisi Donald Tusk Avropa Birligi yaqın eki-üç afta içinde Rusiyege qarşı iqtisadiy sanktsiyalarnı devam ettirecegi aqqında emin olğanını bildirdi.

Avropa Birligi tarafından belgilengen Moskvağa qarşı sıñırcı merasimler iyül ayında yekünlene.

XS
SM
MD
LG