Rusiyeli apishaneden azat etilgen Nadejda Savçenko Ukraina prezidenti olacağınıñ ihtimalı bar olğanını ayttı. Bu aqta o Kiyevde keçirilgen matbuat konferentsiyasında bildirdi.
Onıñ qayd etkenine köre, ukrainler buna muhtac olsa, o bu adımğa azır olacaq.
«Kerek olsa, men elimden kelgenimni yaparım, bu yoldan da keçerim», – dedi Nadejda Savçenko.
Rusiyede 22 yılğa apiske qapatılğan Nadejda Savçenko tünevin deñiştirüv çerçivesinde Kiyevge qayttı.
Mayıs 25-te Rusiye prezidenti Vladimir Putin Savçenkonı afu etüv boyunca emirni imzaladı. Bunı öldürilgen mühbirlerniñ soy-soplarınıñ muracaatına esaslanıp yaptı. Savçenko bu mühbirlerniñ öldürilmesine bağlı olğanında qabaatlanğan edi.
Aynı vaqıtta Ukrainadan Rusiyege eki rusiyeli vatandaş Aleksandr Aleksandrov ve Yevgeniy Yerofeyev qayttılar, olar keçken sene Ukraina şarqında dava territoriyasında yaqalandı ve basqıncı arbiy faaliyet alıp barğanları, insan ölümine ketirgen terroristik eylemini yapqanlarında qabaatlandı. Ukraina prezidenti Petro Poroşenko olarnı afu etüv emrini mayıs 24-te imzaladı.
Bundan evel Savçenko qabaatlarnı red ete edi, oña Rusiyede mahkeme ükmü ilân etilgeninden soñ qabaatnı tanımağanını, afu soramaycağını bildirdi ve öz adliyecilerine bunı yapmağa yasaq etti.
Moskva, Avropa Birligi Rusiyege qarşı onıñ Ukrainadaki basqıncılıq sebebinden sanktsiyalarnı devam ettirmesi meselesi boyunca qarar alacağından bir qaç afta evel Kiyevge Nadejda Savçenkonı teslim etti.
Brüssel tarafından belgilengen Moskvağa qarşı sıñırcı merasimler iyül ayında yekünlene. Olarnıñ müddetini endi bir qaç kere uzattırğan ediler.
