Qırımda rusiyeli arbiy tehnika yarımada boyunca areket etmege devam ete. Tehnika kolonnasını köstergen yañı videonı YouTube saifesinde Alim Aydamak paylaştı.
Bundan evel o qırımtatarlarnıñ evlerinde keçirilgen videolarnı paylaştı.
Mayıs 26-da paylaşılğan videoda onlarca BTR, tank ve arbiy avtomobillerniñ kolonnanen vatandaşlıq maşnaları arasında yolda ketkeni körüne. Videonı tarqatqan Qırım mühbirleri bu videonıñ Aqmescit-Kefe (Simferopol-Feodosiya) yolunda çıqarılğanını qayd ete.
Ukraina Yuqarı Radası Rusiyeniñ vaqtınca Qırım işğaliniñ başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.
