Mayıs 26-da FSB hadimleri tarafından yaqalanğan Qırım sakinleri Timur Osmanov, Hayser Halilov ve Ayder Haltayev uzun vaqıt devam etken sorğulardan soñ azat etildi. Mühbir Şevket Namatullayevniñ bildirgenine köre, olarnı gece «E» merkezinden azat ettiler.
«Olarnı «E» merkezinden tek gece azat ettiler. Olar o yerde saba saat yediden gece saat ekige qadar bulundı. Bütün bu vaqıt devamında olarğa adliyecilerni yibermey ediler. Bundan evel olarnıñ evlerinde tintüvler keçirildi. Sebep olarnıñ ticariy noqtalarında sanki qaçaqlar çalışqanı oldı», – dep yaza mühbir Facebook saifesinde.
Onıñ qayd etkenine köre, uquq qoruyıcılarnıñ Hayser Halilovnıñ evine kelmezden evel kimse azbarda turğan maşnanıñ köpçeklerini boşattı ve bu yerde turğan video nezaret kamerasını çıqardı.
Bunı tasdıqlamaq içün mühbir Hayser Halilovnıñ evinde tintüv keçirilgen vaqıtta yapılğan videonı taqdim ete.
Qırımtatar Milliy Meclisi reisiniñ birinci muavini Nariman Celâl yaqalanğan kişilerge bütün kün devamında adliyecini yebermegenlerini bildire.
Mayıs 26-da, saba beraberlikte bir biznes işini alıp barğan Timur Osmanov, Hayser Halilov ve Artur Haltayevniñ evlerinde tintüvler keçirilgeni aqqında malümat peyda oldı. Bu kibi merasimler qırımtatarlarnıñ Aqmescitteki ticaret noqtalarında da keçirildi.
Emil Kurbedinov Alupkada bu kibi tintüvler keçirilgeni aqqında bildirdi.
Tintüvler boyunca yerli uquq qoruyıcılarınıñ resmiy izaatları yoq.
Ukraina Tışqı işler nazirligi Rusiyeni Qırımda qırımtatarlarnı taqip etmege toqtatmağa, Meclis ise dünyanı Rusiyeni daa ziyade etraf müitinden ayırmağa çağırdılar.
Tintüvler, hırsızlıq ve diger qırımtatarlarğa nisbeten yapılğan basqınlar Qırım işğal etilgen soñ bitmey. Bu aqta daimiy şekilde uquq qoruyıcılar, bu cümleden halqara uquq qoruyıcılar bildire. Lâkin, Kreml ve Rusiyege boysunğan Qırım ükümeti bunı red ete, ve er vaqıt «cinayetniñ milleti yoqtır» dep ilân ete.
Ukraina ükümeti ve halqara toplulıq daimiy şekilde Rusiyeni Qırımda repressiyalarnı toqtatmağa çağıralar.
Ukraina Yuqarı Radası Rusiyeniñ vaqtınca Qırım işğaliniñ başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.
