Ukraina havfsızlıq hızmeti sabıq sovet liderine Mihail Gorbaçövğa Ukrainağa kirmege yasaq etilgenini bildirdi.
Bunıñ sebebi «Qırım işğaline açıq qol tutqanı» oldı.
«Kerçekten de, devlet havfsızlığını temin etmek maqsadınen, şu cümleden Qırımnıñ arbiy işğaline açıq qol tutqanı sebebinden, oña 5 yıl devamında kirişni yasaq ettik», – dep yazdı SBU matbuat kâtibi Yelena Gitlânskaya Facebook saifesinde.
Bu ay Sovet Sotsialistik Cumhuriyetleri Birliginiñ sabıq prezidenti Mihail Gorbaçöv Rusiye tarafından qanunsız Qırım işğalini aqlay edi. The Sunday Times gazetasına bergen intervyusında o, «Qırımda adamlarnıñ çoqusı Rusiyege qoşulmağa istedi», dep bildirdi.
Ukraina Yuqarı Radası Rusiyeniñ vaqtınca Qırım işğaliniñ başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.
