Link açıqlığı

Mayıs 26-da, cumaaqşamı künü Yaponiyada Büyük Yedi (G-7) sammiti başlandı. Bu Yaponiyada 2008 senesi Hokkaydoda keçirilgen yüksek seviyede körüşüvden soñ ilk sammit ola. Yaponiya baş naziri Sindzo Abe dünya liderlerini Honsü adasında İse ibadethanesi yanında qarşıladı, dep bildire Yaponiya ükümetiniñ resmiy saytı.

Sammitte G-7 qıymetleri, birdemlik ve global iqtisat aqqında söz yürsetilecek.

Bundan da ğayrı, terrorizm ile küreş, qaçaqlarnen bağlı vaziyet ve iklim deñişmesi mevzuları muzakere etilecek.

Merasim üç kün devam etecek. Mayıs 27-de sammit neticeleri boyunca beyanname taqdim etilecek.

Bildirilgen malümatqa binaen, sammitniñ resmiy olmağan qısmında Avropa Şurasınıñ reisi Donald Tusk ve Avropa Komissiyasınıñ yolbaşçısı Jan-Klod Yünker iştirak etecekler.

Rusiye temsilcileri 2014 senesi Qırım işğali ve Donbassta arbiy basqıncılıq sebebinden G-7 sammitine endi üç yıl devamında davet etilmey.

Keçken G-7 sammitleri Almaniya (2015) ve Belçikada (2014) keçirilgen edi.

«Büyük Yedi» ya da G-7 yedi yetekçi iqtisadiy taraftan inkişaf etken devletlerniñ birligi ola. Olarnı İngiltere baş naziri Devid Kemeron, Almaniya kantsleri Angela Merkel, İtaliya nazirler şurasınıñ yolbaşçısı Matteo Rentsi, Kanada baş naziri Jastin Trüdo, AQŞ prezidenti Barak Obama, Frenkistan prezidenti Fransua Olland, Yaponiya baş naziri Sindzo Abe temsil eteler.

XS
SM
MD
LG