Link açıqlığı

Aqmescitte tintüvler qanunsız qaçaqlarnen küreşmek maqsadınen keçirilgendir – Celâl


İllüstratsiya fotoresimi

Mayıs 26-da Aqmescitteki Boğurça qasabasında keçirilgen tintüvler qanunsız qaçaqlarnen (migrantlarnen) küreşmek maqsadınen keçirilgendir. Böyle malümatnı Qırımtatar Milliy Meclisi reisiniñ birinci muavini Nariman Celâl bildirdi.

«Beraberlikte iş tutqan Timur Osmanov, Hayser Halilov ve Artur Haltayevde sanki qanunsız qaçaqlar çalışa bile. Bu memuriy bir iş, bunıñ içün büyük para cezası belgilene bile. Bu kibi tintüvler aşhanelerde ve musafirhanelerde keçirile bile», – dep yazdı Celâl Facebook saifesinde.

Mayıs 26-da saba, Celâlnıñ malümatına köre, Timur Osmanovnıñ evinde ve onıñ dostları Hayser ve Arturda tintüvler keçirildi. Timur Osmanov «E» merkezine alıp ketirildi. Tintüvler qırımtatarlarnıñ Aqmescitteki ticaret noqtalarında da keçirildi.

Emil Kurbedinov Alupkada bu kibi tintüvler keçirilgeni aqqında bildirdi.

Tintüvler boyunca Qırım uquq qoruyıcılarınıñ resmiy izaatları yoq.

Tintüvler, hırsızlıq ve diger qırımtatarlarğa nisbeten yapılğan basqınlar Qırım işğal etilgen soñ bitmey. Bu aqta daimiy şekilde uquq qoruyıcılar, bu cümleden halqara uquq qoruyıcılar bildire. Lâkin, Kreml ve Rusiyege boysunğan Qırım ükümeti bunı red ete, ve er vaqıt «cinayetniñ milleti yoqtır» dep ilân ete.

Ukraina Tışqı işler nazirligi Rusiyeni Qırımda qırımtatarlarnı taqip etmege toqtatmağa, Meclis ise dünyanı Rusiyeni daa ziyade etraf müitinden ayırmağa çağırdılar.

Ukraina Yuqarı Radası Rusiyeniñ vaqtınca Qırım işğaliniñ başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.

XS
SM
MD
LG