Link açıqlığı

Uquq qoruyıcılar Aqmescitte qırımtatarlarnıñ ticaret noqtalarında tintüv keçire – Meclis reisiniñ muavini


Mayıs 26-da saba Qırımda başlağan uquq qoruyıcılarnıñ tintüvleri tek qırımtatarlarnıñ evlerinde degil de, amma olarnıñ ticaret noqtalarında da keçirile.

Bu aqta Qırımtatar Milliy Meclisi reisiniñ birinci muavini Nariman Celâl bildire.

Onıñ malümatına binaen, Aqmescitteki Hoş Keldi qasabasında yerleşken ticaret obyektlerinde tintüvler keçirile.

«Timur, Artur ve Hayser beraberlikte bir biznes işini alıp baralar. Aqmescitteki Hoş Keldi qasabasında yerleşken olarnıñ ticaret noqtalarında da tintüvler keçirile. Timur endi «E» merkezinde, Artur ve Hayserde ise tintüvler devam ete», – dep yazdı Celâl Facebook saifesinde.

Mayıs 26-da saba, Celâlnıñ malümatına köre, Timur Osmanovnıñ evinde ve onıñ dostları Hayser ve Arturda tintüvler keçirildi. Emil Kurbedinov Alupkada bu kibi tintüvler keçirilgeni aqqında bildirdi.

Yañı tintüvler boyunca Qırım uquq qoruyıcılarınıñ resmiy izaatları yoq.

Tintüvler, hırsızlıq ve diger qırımtatarlarğa nisbeten yapılğan basqınlar Qırım işğal etilgen soñ bitmey. Bu aqta daimiy şekilde uquq qoruyıcılar, bu cümleden halqara uquq qoruyıcılar bildire. Lâkin, Kreml ve Rusiyege boysunğan Qırım ükümeti bunı red ete, ve er vaqıt «cinayetniñ milleti yoqtır» dep ilân ete.

Ukraina ükümeti ve halqara toplulıq daima Rusiyeni Qırımda repressiyalarnı toqtatmağa çağıra.

Ukraina Yuqarı Radası Rusiyeniñ vaqtınca Qırım işğaliniñ başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.

XS
SM
MD
LG