Link açıqlığı

Aqmescitte tintüvlerden soñ qırımtatarlarnı «E» merkezine alıp keteler – Celâl


İllüstratsiya fotoresimi

Qırımtatar Milliy Meclis reisiniñ birinci muavini Nariman Celâlnıñ bildirgenine köre, mayıs 26-da Aqmescitte eñ azdan üç evde tintüv keçirile. Uquq qoruyıcılar saiplerden birini Rusiyege boysunğan ekstremizmge qarşılıq merkezine («E» merkezi) alıp ketti.

«Aqmescitte Dağcı soqağında yerleşken Timur Osmanovnıñ evinde tintüv keçirildi. Bundan da ğayrı, tintüvler Aqmescitniñ aynı qasabasında yaşağan onıñ dostları Hayser ve Arturnıñ evlerinde de keçirile. Şimdiki vaqıtta Timur uquq qoruyıcı organlarınıñ hadimleriniñ refaqatında öz maşnasınen Dekabristov soqağındaki «E» merkezine kete», – dep bildirdi Celâl Facebook saifesinde.

Mayıs 26-da saba Qırımda qırımtatarlarnıñ evlerinde yañı tintüvler keçirile. Hususan, rusiyeli silâlı uquq qoruyıcılar Aqmescitteki Boğurça ve Hoş Keldi qasabasına keldi. Bunen beraber Alupkada bu kibi tintüvler keçirilgeni aqqında malümat peyda oldı.

Yañı tintüvler boyunca Qırım uquq qoruyıcılarınıñ resmiy izaatları yoq.

Tintüvler, hırsızlıq ve diger qırımtatarlarğa nisbeten yapılğan basqınlar Qırım işğal etilgen soñ bitmey. Bu aqta daimiy şekilde uquq qoruyıcılar, bu cümleden halqara uquq qoruyıcılar bildire. Lâkin, Kreml ve Rusiyege boysunğan Qırım ükümeti bunı red ete, ve er vaqıt «cinayetniñ milleti yoqtır» dep ilân ete.

Ukraina Yuqarı Radası Rusiyeniñ vaqtınca Qırım işğaliniñ başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.

XS
SM
MD
LG