Link açıqlığı

Saatnıñ esas haberi

Qırımda Meclis reisiniñ muavini İlmi Umerovnı kene de FSB-ge çağıralar


İlmi Umerov
İlmi Umerov

Qırımtatar Milliy Meclisiniñ reis muavini İlmi Umerovnı mayıs 26-da, cumaaqşamı künü Aqmescitteki rusiyeli Federal havfsızlıq hızmetine çağıralar. Bu aqta onıñ qızı Ayşe Umerova Facebook saifesinde bildire.

«Yarın saat 10:00-ğa İlmi Umerov kene de Aqmescitteki FSB idaresine (Franko bulvarı, 13) çağırıla. Taqiqatçınıñ bildirgenine köre, ekspertizağa berilecek malümatlarnen tanış olmaq içün çağırdılar. Ğaliba, o, qabaatlavda qayd etilgen ATR telekanalınıñ mart 19-da yapılğan yayınınıñ videosını közde tutadır», – dep yazdı Umerova.

Mayıs 19-da Qırımtatar Milliy Meclisiniñ reis muavini İlmi Umerovğa rusiyeli Federal havfsızlıq hızmetiniñ Qırım idaresinde sorğudan soñ qabaatlavnı taqdim ettiler.

Bundan evel, mayıs 12-de onıñ evinde tintüv keçirildi, Rusiye FSB-niñ Qırım idaresiniñ taqiqatçısı oña çıqmamaq şartını bildirgen vesiqanı berdi.

Kremlge boysunğan Qırım prokuraturası Umerovğa qarşı «separatizm» içün cinaiy iş açqanını resmiy şekilde ilân etti.

Ukraina Yuqarı Radası Rusiyeniñ vaqtınca Qırım işğaliniñ başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.

XS
SM
MD
LG