Azerbaycan Yuqarı mahkemesi Azatlıq Radiosınıñ mühbiri Hadica İsmailovanı, onıñ mahkeme ükmü yedi yarımdan üç yarım yılğa qadar qıstartılğan soñ, apisten azat etmege qararını qabul etti. Mahkeme bu qararnı mayıs 25-te mühbirniñ şikâyet arizasını diñlegen soñ qabul etti, dep bildire Azatlıq Radiosı.
«Bu Hadica ve bütün mühbirler içün ve bütün dünyada söz serbestligi içün büyük bir kündir. Biz Hadica ve onıñ qorantası içün pek quvanamız, ve onıñ işke qaytacağını pek bekleymiz», – dep ayttı Azatlıq Radiosı/ Azat Avropa Radiosınıñ baş muarriri Nenad Peiç.
İsmailova 2014 senesi dekabr ayında yaqalandı ve 2015 senesi sentâbr ayında bergi tölemegeni ve masraf etkeni içün mahkeme ükmüni aldı. Ğarbiy ükümetler ve neşir serbestligi boyunca halqara gruppalar onıñ azat etilmesine çağırdılar.
Cemaat teşkilâtları İsmailovanıñ Azerbaycan prezidenti İlham Aliyevniñ qorantasını qabarcılıqta qabaatlağan mühbir taqiqatları sebebinden qabaatlanğanını tüşüne.
2016 senesi mayıs 3-te Azerbaycanda yaqalanğan mühbir Hadica İsmailova «Ağır şaraitte neşir serbestligine büyük isse qoşqanı içün» UNESCO/Guillermo Cano mükâfatına nail oldı. Taqdim merasimi Helsinki şeerinde (Finlandiya) keçirildi. Mükâfatnı mühbirniñ anası Elmira İsmailova aldı.
