Link açıqlığı

Qırımda Ervin İbragimovnıñ babası politsiyağa onıñ oğlu ğayıp olğanı aqqında ariza yazdı


Ervin İbragimov

Rusiye tarafından işğal etilgen Qırımda bu gece ğayıp olğan Ervin İbragimovnıñ babası Moskvağa boysunğan yarımada prokuraturasına onıñ oğlunı tapmaq içün ariza yazıp muracaat etti.

Mayıs 25-te, çarşenbe künü adliyeci Emil Kurbedinov bu aqta bildirip, Facebook saifesinde ariza nushasını paylaştı.

«Menim oğlumnıñ – İbragimov Ervin Umer oğlunıñ – bulunğan yerini tapmaq içün qırıduv işleriniñ teşkil etilmesini rica etem», – dep aytıla arizada.​

İbragimov arizada mayıs 25-te Bağçasaray politsiyasına oğlu ğayıp olğanı sebebinden muracaat etkenini qayd etti. Onıñ sözlerine binaen, o politisyada onıñ oğlu Ervin İbragimovnıñ maşnası evniñ yanında bulunğanını, maşna qapıları ve bardaçök (vesiqalar içün qutuçıq – QA) açıq olğanını bildirdi.

Mayıs 25-te, saba Bağçasarayda devlet şurasınıñ sabıq deputatı, Bütün Dünya Qırımtatar Kongressiniñ İcra komitetiniñ azası Ervin İbragimov bu gece ğayıp olğanı aqqında bildirile edi. Onıñ maşnası yol ortasında qaldırılğan tapıldı. Mayıs 24-te tahminen saat 23:00-te Ervin babasına telefon etip, ondan maşna vesiqaları aqqında soradı. Bundan soñ Ervinnen bağ bozuldı.

Ğayıp olğan Ervin İbragimov mayıs 25-te Meclis azalarınen Sudaqqa barmağa niyetlene edi, o yerde qırımtatar faalleri mahküm etilecegi planlaştırılğan.

Bundan soñ internette video peyda oldı, videoda Ervin İbragimovnı, tahminlerge köre, Yol patrul hızmetiniñ hadimleri toqtadı, soñra onı mikroavtobusqa oturtmağa tırıştılar, o qaçmağa tırıştı, amma onı tuttılar ve maşnağa oturttılar. Bundan soñ maşna Bağçasaray suv anbarı tarafına, ormandan keçip ketti.

Qırım işğal etilgen soñ yarımada territoriyasında adamlar, hususan qırımtatarlar ğayıp olmağa başladı. Bunen beraber, Rusiyege boysunğan Qırım taqiqat komitetinde «yarımadada qırımtatarlar kütleviy şekilde ğayıp olmağanını» bildireler.

Ukraina Yuqarı Radası Rusiyeniñ vaqtınca Qırım işğaliniñ başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.

XS
SM
MD
LG