Link açıqlığı

Ukraina prezidenti: Savçenkonı qaytarğanımız kibi, Qırım ve Donbassnı da qaytaracaqmız


Nadejda Savçenko Ukrainada, 2016 senesi, mayıs 25

Ukraina prezidenti Petro Poroşenko Rusiye apishanesinden ukrain uçucısı Nadejda Sevçenkonıñ azat etilmesinden soñ Ukraina şimdiki vaqıtta Rusiye tarafını tutqan separatistlerniñ nezaretinde olğan işğal etilgen Qırımnı ve Donbassnıñ qısmını qaytarıp olur, dep ümüt besley.

Bu aqta Poroşenko mayıs 25-te Kiyevde Ukraina prezidentiniñ memuriyetinde Nadejda Savçenko ile beraberlikte keçirilgen brifingte bildirdi.

«Nadejdanı qaytarğanımız kibi, Qırım ve Donbassnı da qaytaracaqmız», – dedi Ukraina prezidenti.

Bundan da ğayrı, ukrain devletiniñ reisi endi Soloşenko, Afanasyev, Sentsov, Kolçenko ve diger siyasiy mabüslerniñ evge qaytmasını beklegenini bildirdi.

Rusiye apishanesinde bulunğan Nadejda Savçenko mayıs 25-te, rusiyeli askerler Aleksandrov ve Yerofeyevge deñiştirüvden soñ, Ukrainağa qayttı.

Nadejda Savçenkonı Rusiyede 22 yılğa apiske qapattılar, onı Donbassta rusiyeli mühbirlerniñ öldürüvinde qabaatladılar. Savçenko ve imayeciler bütün qabaatlarnı red ete. Nadejda Savçenko bir qaç kere açlıq, bu cümleden quru açlıqnı ilân etken edi, böyle etip azatlıq ve Ukrainağa qaytuvnı talap ete edi.

Aprel 18-de Kiyevdeki Goloseev rayon mahkemesi keçken sene Ukraina şarqıy tarafında dava territoriyasında yaqalanğan Yerofeyev ve Aleksandrovnı tecavuziy arbiy areketler yapqanlarında, terroristik teşkilâtında iştirak etkenlerinde ve adam ölümine yol bergen terroristik eylem yapqanlarında qabaatladı. Mahkeme olarğa 14 yıl apiste bulunma cezasını belgiledi. Mayıs 23-te rusiyeli askerlerine qarşı mahkeme ükmü işke tüşürildi.

XS
SM
MD
LG