Bu gece Rusiye tarafından işğal etilgen Qırımda Bütün Dünya Qırımtatar Kongressiniñ İcra komitetiniñ azası Ervin İbragimovnıñ Bağçasarayda yaqalanmasını köstergen video internette peyda oldı.
Qırım mühbiri, «15 minut» saytınıñ muarriri Ayşe Umerova İbragimov ğayıp olğan yerine yaqın yerleşken tükandaki video kamera yazğan videonı Facebook saifesinde paylaştı.
«Onı, tahminlerge köre, Yol patrul hızmetiniñ hadimleri toqtadı, soñra onı mikroavtobusqa oturtmağa tırıştılar, o qaçmağa tırıştı, amma onı tuttılar ve maşnağa oturttılar. Soñra maşna Bağçasaray suv anbarı tarafına, ormandan keçip ketti», – dep añlattı Umerova.
Bundan evel Qırımtatar Milliy Meclisi reisiniñ birinci muavini Nariman Celâl bu gece ğayıp olğan Bütün Dünya Qırımtatar Kongressiniñ icra komitetiniñ azası Ervin İbragimovnıñ yaqalanmasını köstergen video bar olğanını bildirgen edi.
Mayıs 25-te, saba Bağçasarayda devlet şurasınıñ sabıq deputatı, Bütün Dünya Qırımtatar Kongressiniñ icra komitetiniñ azası Ervin İbragimov bu gece ğayıp olğanı aqqında bildirile edi. Onıñ maşnası yol ortasında qaldırılğan tapıldı. Ervin İbragimov mayıs 25-te Meclis azalarınen Sudaqqa barmağa niyetlene edi, o yerde qırımtatar faalleri mahküm etilecegi planlaştırılğan.
Qırım işğal etilgen soñ yarımada territoriyasında adamlar, hususan qırımtatarlar ğayıp olmağa başladı. Bunen beraber, Rusiyege boysunğan Qırım taqiqat komitetinde «yarımadada qırımtatarlar kütleviy şekilde ğayıp olmağanını» bildireler.
Ukraina Yuqarı Radası Rusiyeniñ vaqtınca Qırım işğaliniñ başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.
