Link açıqlığı

Ervin İbragimovnı Qırımda Yol patrul hızmetiniñ urbasındaki adamlar hırsızladı, bunıñ videosı bar – Celâl


Ervin İbragimov

Ervin İbragimovnı Qırımda Yol patrul hızmetiniñ urbasındaki adamlar hırsızladı, bunıñ videosı bar – Celâl

Qırımtatar Milliy Meclisi reisiniñ birinci muavini Nariman Celâl bu gece ğayıp olğan Bütün Dünya Qırımtatar Kongressiniñ icra komitetiniñ azası Ervin İbragimovnıñ yaqalanmasını köstergen video bar olğanını bildire. Onıñ sözlerine köre, videoda rusiyeli Yol patrul hızmetiniñ urbasındaki adamlar körüne.

Bu aqta Nariman Celâl Qırım.Aqiqatqa bergen izaatta bildirdi.

Onıñ qayd etkenine köre, yaqalavnı yaqında yerleşken tükânlarnıñ birinde olğan video kameraları yazıp çıqtı. Video uquq qoruyıcı organlarına teslim etildi, amma onıñ yaqın vaqıtta halqqa kösterileceginde emin degil.

«Bu videonı körgen insanlarnıñ sözlerine binaen, videoda Yol patrul hızmetiniñ urbasındaki insanlar körüne, olar Ervin İbragimovnı toqtadı, maşnadan çıqardı ve diger maşnağa oturttı, bundan soñ kettiler. Fikirimizce, bu hırsızlıq olğanı belli. Çünki eger bu yaqalav olsa edi, Ervinniñ yaqın soy-soplarına haber etmege ve adliyecilerge telefon etmege aqqı bar edi», – dep añlattı Celâl.

Celâlnıñ aytqanına köre, hırsızlıq yarı gecege yaqın, İbragimov yaşağan yerine yaqın, Mira soqağında yüz berdi. Şimdiki vaqıtta aqay kişi ne yerde bulunğanı belli degil.

«Bu, uquq qoruyıcı organları, hususan DPS (Yol patrul hızmeti) hadimleriniñ qanunsız faaliyette iştirak etkeni ilk sefer degil», – dep qayd etti Meclis reisiniñ muavini.

İbragimovnıñ vaziyeti aqqında işğal etilgen Qırımnıñ uquq qoruyıcı organlarınıñ resmiy beyanatları yoq.

Bundan evel mayıs 25-te gece Bağçasarayda devlet şurasınıñ sabıq deputatı, Bütün Dünya Qırımtatar Kongressiniñ icra komitetiniñ azası Ervin İbragimov ğayıp olğanı aqqında bildirile edi. Onıñ maşnası yol ortasında qaldırılğan tapıldı. Ervin İbragimov mayıs 25-te Meclis azalarınen Sudaqqa barmağa niyetlene edi, o yerde qırımtatar faalleri mahküm etilecegi planlaştırılğan.

Qırım işğal etilgen soñ yarımada territoriyasında adamlar, hususan qırımtatarlar ğayıp olmağa başladı. Bunen beraber, Rusiyege boysunğan Qırım taqiqat komitetinde «yarımadada qırımtatarlar kütleviy şekilde ğayıp olmağanını» bildireler.

Ukraina Yuqarı Radası Rusiyeniñ vaqtınca Qırım işğaliniñ başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.

XS
SM
MD
LG