Kremlge boysunğan Aqmescit memuriyetiniñ reis muavini Teyfuk Ğafarovğa mahkeme qararınen beş biñ ruble para cezası belgilendi. Bu aqta Rusiyege boysunğan işğal etilgen Qırım prokuraturasınıñ matbuat hızmeti bildire.
«Aqmescit prokuraturası şeer memuriyeti tarafından vatandaşlarnıñ muracaatları boyunca qanunlarnıñ yerine ketirilmemesi boyunca yerli sakinniñ muracaatını teşkerdi. «Rusiye Federatsiyası vatandaşlarınıñ muracaatlarını baquv tertibi aqqında» Federal qanunınıñ talaplarınıñ, hususan kelgen muracaatlarnıñ diger adreske teslim etilmesi aqqında haber etüv müddetleriniñ bozulması belgilendi», – dep aytıla beyanatta.
Şeer prokurorı, teşkerüv neticelerine esaslanıp, Aqmescit memuriyetiniñ reis muavini Teyfuk Ğafarovğa qarşı memuriy qanunnı bozuv aqqında iş açtı. Para cezasını Aqmescit Merkeziy rayon mahkemesi belgiledi.
Bunen beraber, memurnıñ izaatı yoq.
Ukraina Yuqarı Radası Rusiyeniñ vaqtınca Qırım işğaliniñ başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.
