Link açıqlığı

Ukraina prezidenti Petro Poroşenko apayı Marina ve oğlu Mihail ile, bundan da ğayrı, ukrain askerleri ve ayırı ihtiyaçları olğan balalarnen beraber «Eurovision-2016» ğalibı olğan qırımlı Jamalanıñ Kiyevde keçken kontsertini ziyaret etti.

Bu aqta ukrain devleti reisiniñ matbuat hızmeti bildire.

Bildirilgen malümatqa binaen, prezident Jamalanıñ kontsertine «Baş arbiy klinik hastahanesinde» tedaviylengen askerlerni, onıñ apayı ise ayrı ihtiyaçları olğan balalarnı davet ettiler. Zalda bulunğanlar ukrain askerleriniñ hatırasını sükünet daqqasınen añdı.

Matbuat hızmetiniñ malümatına binaen, kontsert yekünlengen soñ Poroşenkolar balalar ve askerlernen beraber Jamalanen qonuştılar. Devlet reisi yırcığa çiçekler bağışladı ve ayrette qaldırğan kontsert içün teşekkür bildirdi.

«O qadar çoq çiçekni ömrümde iç körmegen edim. Bu yerde acayip bir müit oldı», – dep bildire Poroşenkonıñ sözlerini matbuat hızmeti.

Yırcı ise, seyircilerniñ destegini ayrıca qayd etti.

«Er kontsertni kerçekten adamlar yapa. Men er vaqıt olğanı kibi yırlarımnı icra etem, amma er vaqıt seyirciler ve olarnıñ duyğuları deñişe. Bugün, kerçekten de, pek güzel adamlar oldı», – dedi o.

Kontsert programmasında yırcınıñ yañı «Podıh» («Nefes») adlı albomından yırlar icra etildi. O «Eurovision-2016» yarışında ğalebe qazanğan «1944» türküsini da icra etti.

Jamala «Eurovision-2016» yır yarışında «1944» türküsinen ğalebe qazandı, onıñ finalı mayıs 15-te İsveçiya paytahtı Stokgolm şeerinde keçirildi. «1944» yırı qırımtatar halqınıñ 1944 senesi kütleviy şekilde Orta Asiyağa sürgün etilgeni aqqında añlata.

Konkursta ekinci yerni Avstraliya, üçünci yerni ise Rusiye qazandı.

Ukraina Prezidenti Petro Poroşenko Jamalağa halq artisti unvanını berdi.

XS
SM
MD
LG