Link açıqlığı

İyün 26-da Tel-Avivde Azrieli merkeziniñ yanındaki ofis binaları biriniñ damında rejissör Konstantin Klâtskinniñ «Qırım. Bu nasıl oldı» adlı vesiqalı film taqdim etilecek.

Filmde ingliz tilinde subtitrler bar. Bu Babylon'13 vesiqalı kino hadimleri birleşmesiniñ ilk Qırım aqqında vesiqalı uzun filmi ola.

«Film seyircilerge Qırım yarımadasında rusiyeli askerlerniñ bulunmasını tasdıqlağan vesiqalı kadrlarnı ve deñizciler, uçucılar, ava askerleri ve deñiz piyade askerleriniñ qomşu devletten davet etilmegen musafirlerge yengil olmağan qarşı turması aqqında kerçek ikâyelerini taqdim ete», – dep ayta film taqdiminiñ teşkilâtçıları.

Üç novelladan ibaret olğan film on eki insannıñ ikâyesini añlata. Çıqaruvlar şimdiki vaqıtta film qaramanları yaşağan ukrain şeerlerinde keçirildi. Bu Nikolayev, Odessa, Mariupol.

Film NATO Information and Documentation Centre destegi ile yapıldı. Bundan evel film Kiyevde taqdim etildi.

Ukraina Yuqarı Radası Rusiyeniñ vaqtınca Qırım işğaliniñ başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.

XS
SM
MD
LG