Mayıs 25-te Rusiye tarafından işğal etilgen Qırımda oquv yılı yekünlenmesi qayd etile. Yarımada mekteplerinde «soñki çañ» bayramına bağışlanğan merasimler keçirile. Bu kün merasimler nasıl şekilde keçirilecegi aqqında malümat Rusiyege boysunğan Qırım ükümetiniñ ve tasil nazirliginiñ saytında yoq.
Keçken sene bir sıra Qırım mekteplerinde tantanalı merasimler bir qaç kün evelce keçirildi. Böyle etip, rusiyeli işğalden soñ «Aqmescit akademik gimnaziyası» dep adlandırılğan Aqmescitteki Ukrain mektep-gimnaziyasınıñ talebeleri soñki çañ bayramına vışıvanka kiyip keldi. Diger mekteplerde bayram rusiyeli bayraq ve SSSR bayraqları ile bile qayd etile edi.
Ukraina Tasil ve ilim nazirliginde umumiy çan bayramına bağışlanğan merasimlerniñ keçirilmesini mayıs 26-ğa tayinlediler. Mezun merasimleri tahminen iyün 15-ten soñ keçirilecek.
Ukraina Yuqarı Radası Rusiyeniñ vaqtınca Qırım işğaliniñ başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.
