Link açıqlığı

Bu gece Bağçasarayda devlet şurasınıñ sabıq deputatı, Bütün Dünya Qırımtatar Kongressiniñ icra komitetiniñ azası Ervin İbragimov ğayıp oldı. Onıñ maşnası yol ortasında qaldırılğan tapıldı.

Bu aqta Qırım.Aqiqatqa Qırımtatar Milliy Meclisi reisiniñ birinci muavini Nariman Celâl bildirdi.

«Tünevin yarı gecege yaqın dostumız ve arqadaşımız ğayıp oldı. Tahminen saat on birde o babasınen bağlandı, bundan soñ, onıñ babası Baçğasarayda evine bir turaq uzaqlığında qaldırılğan maşnasını taptı. Anahtar içinde edi, maşna açıq turğan, bardaçok (vesiqalar içün qutuçıq – QA) açıq edi, onı ise alâ daa tapıp olamaylar ve onıñ ne yerde bulunğanı belli degil», – dedi Nariman Celâl.

Onıñ sözlerine köre, ana-babası onıñ ne yerde bulunğanını bilmey, o bağda degil.

«Şimdiki vaqıtta onıñ ne yerde bulunğanı ve onen ne olğanı aqqında tek tasavur ete bilemiz», – ayttı Celâl.

Nariman Celâlnıñ qayd etkenine köre, Ervin İbragimov mayıs 25-te Meclis azalarınen Sudaqqa barmağa niyetlene edi, o yerde qırımtatar faalleri mahküm etilecegi planlaştırıla.

Qırım sakini ğayıp olğanı munasebetinen uquq qoruyıcılarnıñ resmiy beyanatları yoq.

Qırım işğal etilgen soñ yarımada territoriyasında adamlar, hususan qırımtatarlar ğayıp olmağa başladı. Bunen beraber, Rusiyege boysunğan Qırım taqiqat komitetinde «yarımadada qırımtatarlar kütleviy şekilde ğayıp olmağanını» bildireler.

Ukraina Yuqarı Radası Rusiyeniñ vaqtınca Qırım işğaliniñ başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.

XS
SM
MD
LG