Qırım bala bağçalarınıñ pedagog olmağan hadimleri regionda yaşama minimumına köre 30 fayız azca aylıq ala. Bunı Qırım cemaat erbabı, «Qırım cumhuriyet qabarcılıqqa qarşı komiteti» regional cemaat teşkilâtınıñ reisi İlya Bolşedvorov bildirdi.
«Maña, cemaat erbabına olaraq, Qarasuvbazar rayonınıñ mektepten evelki bala müessiseleriniñ terbiyecileri muracaat etti. Pedagog olmağan hadimlerniñ aylığı qanun boyunca tasdıqlanğan ölçüge doğru kelmey, em de Qırımda yaşama minimumına köre 30 fayız azcadır», – dep qayd ete Bolşedvorov.
Cemaat erbabı öz sözlerini Qarasuvbazardaki «Berözka» bala bağçasından aylıq cedvelinen tasdıqladı.
Bolşedvorovnıñ qayd etkenine köre, o Rusiye prezidenti Vladimir Putinge, bütün Rusiye Baş prokuraturasına, Federatsiya Şurasına, Rusiyede insan aqları boyunca vekâletlige ve rusiyeli Qırım tasil nazirine şikâyet arizalarını azırladı.
Tünevin Qırım sakinleri Rusiye baş naziri Dmitriy Medvedevge pensiyalar kiçik olğanına şikâyet etti. Buna cevap olaraq, rusiyeli baş nazir, «para yoq» sebebinden, pensiya indeksatsiyasına para olmağanını bildirdi.
Bundan soñ Rusiye Pensiya fondu Qırım sakinleri içün tafsilâtlı şekilde indeksatsiyanı añlatqan beyanatnı paylaştı.
Ukraina Yuqarı Radası Rusiyeniñ vaqtınca Qırım işğaliniñ başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.
