Rusiyege boysunğan Yol areketiniñ havfsızlığı boyunca Devlet inspektsiyasınıñ (GİBDD) Qırım idaresinde Qurman (Krasnogvardeyskoye) rayonında yüz bergen qaza aqqında bildireler. O yerde yolcu taşığan avtobus yoldan çıqıp, tereklerge uruldı. Neticede altı insan zararlandı, olardan dört kişi çeşit sınıqlar aldı.
Müessiseniñ malümatına binaen, qaza tünevin yüz berdi. ТЕМZА РRЕSТIJ avtobusınıñ aydavcısı Aqmescit tarafından Canköy tarafına kete edi.
«Aqay kişi aydap olamadı, yoldan sağ tarafqa çıqtı ve maniaga (tereklerge) uruldı», – dep aytıla beyanatta.
Aydavcı ve bir yolcu yaralandılar, dört yolcu el-ayağını, qaburğalarını sındı.
Ukraina Yuqarı Radası Rusiyeniñ vaqtınca Qırım işğaliniñ başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.
