Ukraina tarafdarları olğan Qırım sakinleri birleşmege aşıqmay, yarımadada Ukrain medeniyeti merkeziniñ teşebbüslerine qoşulmay: adamlar taqip etilmesinden qorqa. Böyle fikirni Qırımda Ukrain medeniyeti merkeziniñ (UMM) temsilcisi Alena Popova Qırım.Aqiqat Radiosınıñ yayınında bergen izaatında bildirdi.
«Adamlar milliy mensüpligine köre birleşmege istemey, arzu etmey, teşebbüsimizge (UMM-ge – QA) şübelenip baqa. Bu uquq qoruyıcılarğa öz adlarını açıqlamaq, özüni köstermek içün daa bir sebep olacağını ve özüne ayrı diqqat celp ete bilecegini tüşüneler. Yani bu adamlarğa ayrı diqqat etilecektir», – dedi Alena Popova.
Qırımda Ukrain medeniyeti merkezi yarımada faalleri tarafından teşkil etilgen cemaat teşkilâtı ola. Onıñ esas maqsadı ukrain halqınıñ til ve medeniyetini saqlamaqtır. Olarnıñ siyasiy maqsatları yoq.
Ukraina Yuqarı Radası Rusiyeniñ vaqtınca Qırım işğaliniñ başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.
