Rusiye rus-ukrain sıñırında öz küçüni quvetleştire ve Ukrainanı zapt etmek niyetinden vazgeçmey. Bu aqqında cumaertesi künü jurnalistlerge Ukraina mudafaa naziri Stepan Poltorak ayttı.
«Rusiye öz gruppirovkalarını Ukraina ile sıñırında quvetlştirgeninin açıq közetemiz. Olar bazı qoşma birleşmelerni ve arbiy bölüklerni Ukraina ile sıñırda açmaq isteyler. Bu birinciden, Rusiye Ukrainağa qarşı zorbalıq siyasetinden vezgeçmegenini köstere, ekinciden, Rusiye Ukrainanı zapt etmek istey», – dep ayttı Poltorak.
Onıñ aytqanına köre, şimdi Ukraina öz mevzilerini ve mudafaasını zayıflatmaycaq.
«Buña qarşı çıqamazmız – Rusiyeniñ işlerine ve Rusiye mudafaa naziriniñ beyanatlarına, - amma beklenilmegen areketlerge azır olmaq içün doğru qararlarnı bilemiz, işimizni doğru planlaştıra bilemiz», – dep qoştı Stepan Poltorak.
Ukraina Yuqarı Radası Rusiyeniñ vaqtınca Qırım işğaliniñ başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.
Donbassta cenk areketleri 2014 senesi aprel ayından berli devam ete. Bu müddet içinde, Birleşken Milletler Teşkilâtınıñ malümatına köre, tahminen 10 biñ insan can berdi. Donbass separatistlerini Rusiye destekley, amma Moskva şarq Ukrainada Rusiye askerleri olğanını red etip, «göñülliler» aqqında ayta.
