İngilterede ilk sefer Cambridge universitetinde qırımtatar tili ve medeniyeti kursı teşkil etildi. Bu aqta Qırım.Aqiqatqa dünyada ilk webinar şeklinde keçirilgen «Qırım Tili Online» kursınıñ teşkilâtçısı, qırımtatar tili ocası Zenife Seydametova añlattı. O Kembricdeki derslerni azırlap keçirdi.
Mayıs 19-20 künleri keçirilgen kurs 4 saadaki 8 dersten ibaret oldı: til, edebiyat, medeniyet ve muzıka.
«Kursnıñ esas maqsadı talebelerniñ qırımtatar tili, tarihı, medeniyeti, muzıkası ve sanatına merağını doğurmaqtır... Qırımtatar tilini bilseñiz, türk, azerbaycan, özbek, gagauz ve daa çoq tillerni añlay bilirsiñiz», – dep añlattı Zenife Seydametova.
Seminar çerçivesinde, kurs teşebbüsçi ve teşkilâtçısı doktor Rori Finnin «Qırımtatar edebiyatınıñ «parlaq yıldızı»: Şamil Alâdin» mevzusı boyunca numayışnı taqdim etti, edebiyat vastasınen ukrainlerniñ qırımtatarlarnen munasebetleri mevzusını açıqladı.
Şu cümleden Bard kolleciniñ (Amerika Qoşma Ştatları) muzıka dotsenti Mariya Sonevitski merasimde iştirak etip, 1944 senesinden soñ qırımtatar muzıkasında asret mevzusını añlattı.
Kurslarda İngiltereniñ, bu cümleden Cambridge, London ve Oxford universitetleriniñ 10 aspirantı iştirak etti. Olar latin urufatı esasında qırımtatar elifbesini, grammatika esaslarını ögrendi, 5-7 daqqa içinde «Güzel Qırım» halq yırınıñ bağlamasını ögrenip yırladılar, seminar soñunda «Haytarma» oyunını ögrenip icra ettiler.
Kelecekte teşkilâtçılar kursnı daa keñ şekilde keçirmege ve daa çoq ocalarnı celp etmege planlaştıra.
