Mayıs 26-dan iyün 4-te qadar «Qırım reineleri» Oleg Sentsov, Aleksandr Kolçenko, Gennadiy Afanasyev ve Aleksey Çirniy ile birdemlik künleri başlana.
Cemaat faalleri lâqayt qalmağanlarnı bu künlerge qoşulmağa davet eteler.
«İstegeniñiz kibi iştirak ete bilesiñiz: lektsiya, muzakere, kino kösterüvleri, hayrie mezat, sergi, kontsert, master-klass, graffiti-reyd, miting, flashmob ya da «Qırım dörtligi» aqqında hatırlatacaq başqa bir tedbir», – dep bildire «Birdemlik komiteti» siyasiy mabuslarına yardım komiteti.
Ukraina vatandaşları Oleg Sentsov, Aleksandr Kolçenko, Gennadiy Afanasyev ve Aleksey Çirniyni Aqmescit şeerinde 2014 senesi mayıs ayında Rusiye Federal telükesizlik hızmeti yaqaladı. Olarnı Qırımnıñ Rus cemaatı ofis qapusı ve «Yekâne Rusiye» fırqasınıñ ofis pencerelerini ateşke bermesinen qabaatladılar. Bu areketler Rusiye taqiqatı tarafından «terrorizm» olaraq tanıldı.
Oleg Sentsovnı sert rejim tüzelme apishanesinde 20 yılğa qadar azatlıqtan marum ettiler, Aleksandr Kolçenko – 10 yıllıq sert rejimge, Gennadiy Afanasyev ve Alekset Çirniyni – 7 yıllıq sert rejimge.
Şimdi Sentsov Yakutiyada cezasını köre, Kolçenko – Çelabinsk vilâyetinde, Çirniy – Magadan vilâyetinde, Gennadiy Afanasyev añlaşılmağan sebeplerden Komi Cumhuriyetinden Moskva Lefortovo taqiq izolatorine «taqiq areketler içün» keçirildi.
