Link açıqlığı

Poroşenko Türkiyede Qırımdaki repressiyalardan sebep Avropa Şurasını Rusiyege nisbeten basqılarını quvetleştirmege çağırdı


Petro Poroşenko

Ukraina prezidenti Petro Poroşenko Türkiyeni iş maqsadınen ziyaret etip, Avropa Şurasınıñ baş kâtibi Thorbjørn Jagland ile körüşti. Türkiyede Birleşken Milletler Teşkilâtınıñ Dünya insaniy zirvesi keçirilmekte. Ukraina prezidenti Rusiye işğal etken Qırımdaki repressiyalarnı qayd etti. Bunı Poroşenkonıñ matbuat hızmeti bildire.

«Prezident Rusiye işğal etken Qırımda qırımtatarlar ve ukrainlerniñ insan aqları bozulğanını qayd etti. Petro Poroşenko Avropa Şurasını Rusiyege basqılarını quvetleştirmege çağırdı», – dep aytıla haberde.

Matbuat hızmetiniñ malümatına köre, Poroşenko ve Jagland ukrain islâatlarınıñ ketişatını muzakere ettiler. Avropa Şurasınıñ baş kâtibi «Ukrainanıñ yañı baş prokurorı saylanmasını ve Ukraina prezidentiniñ akimiyetteki mahkeme dalında Avropa standartlarına köre islâat keçirmek ğayretlerini tebrikledi».

Ukraina ve halqara uquq qorçalayıcıları Rusiyeniñ Qırım işğalinden soñ yarımadada insan aqlarına riayet etüv vaziyeti kerginleşkenini qayd ete ediler. Rusiye akimiyeti qırımtatarlar ve Ukrainağa qoltutqan vatandaşlarğa basqı yapa.

Rusiye kontrol etken Qırım akimiyeti uquq qorçalayıcılarnıñ yarımadada insan aqlarınıñ bozulmasına dair malümatları qabartıla, dep bildire.

Ukraina Yuqarı Radası Rusiyeniñ vaqtınca Qırım işğaliniñ başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.

XS
SM
MD
LG