Keçken raatlıq künleri Varşava merkezinde Ukraina vışıvankaları (ukrain milliy urbası) paradı olıp keçti. Lehistanda yaşağan tahminen elli ukrainalı paytahtnıñ merkezinden Ukraina ve qırımtatar bayraqlarınen keçti.
Bunı tedbir teşkilâtçıları – Poloniyada bunıñ kibi yürüşlerni 4 yıldan berli keçirgen yerli «Euromaydan» faalleri bildirdi.
Tedbirde Lehistanda oquğan Qırımlı studentler faal sürette iştirak ettiler. «Fundamentatsiya Krım» başı Riza Asanovnıñ aytqanına köre, aktsiyada iştirak etkenlerni Avropadaki Ukraina diasporası ile birlik olğanını köstermege çağırdılar.
«Bizni, qırımtatarlarnı, Varşavada olğan Ukraina teşkilatlarına qoltutmağa davet ettiler. Küçük bir mitingte ukrainalılar ve qırımtatarlarnıñ birligi aqqında ayttılar», – dedi o.
Şimdi Lehistanda qırımtatarlarınıñ bayrağını körgende insanlar bu nasıl bayraq dep soramaylar, qayd ete Riza Asanov.
Poloniyalılarğa ve Avropağa Ukraina ve işğal olğan Qırımnıñ meselelerini hatırlatmaq müim bir vazife edi, dep qayd eteler tedbir teşkilatçıları.
Çeh Cumhuriyetiniñ paytahtında da vışıvanka marşı olıp keçti, ondan evel ise Ukraina şeerlerinde bunıñ kibi tedbirler keçirildi. Merasimler vışıvanka kününe bağışlana. 2007 senesi peyda olğan yañı adettir. Bayram mayıs üçünci cumaaqşamı künü keçirile, amma resmiy statusı yoq.
Ukraina Yuqarı Radası Rusiyeniñ vaqtınca Qırım işğaliniñ başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.
