Link açıqlığı

Poroşenko Türkiyedeki Birleşken Milletler Teşkilâtınıñ insaniy zirvesinde qırımtatarlarnıñ problemleri aqqında aytacaq


Mayıs 23-te Türkiyede başlağan Birleşken Milletler Teşkilâtınıñ Dünya insaniy zirvesinde Ukraina prezidenti Petro Poroşenko qırımtatarlar, olarnıñ problemleri ve alacaq yardımları mevzusını aydınlatmaq istey.

Bu aqqında Ukraina prezidentiniñ saytında aytıla.

«Mayıs 23-te ukrain tarafınıñ teşebbüsi ile «Qırımtatar halqı ve oña yardım etme mevzusında ükümet ve vatandaşlarnıñ rolü meselesi üzerinde Ukrainada zarar körgenlerniñ insaniy ihtiyacları» mevzusında qoşma bir tedbir keçirilmesi planlaştırıla», – dep qayd ete prezidentniñ memuriyeti.

Türkiyege BMT Dünya insaniy zirvesinde iştirak etmek içün ketken ukrain eyyeti erkânında qırımtatarlarnıñ liderleri Mustafa Cemilev ve Refat Çubarov da barlar.

Birleşken Milletler Teşkilâtınıñ imayesi altında keçirilgen eki künlik toplaşuvlarda devlet ve ükümet yolbaşçıları, 100-den ziyade memleketten kelgen yüksek rutbeli memurlar dünyada silâlı zıddiyet ve felâketlerden zarar körgen insanlarnıñ ihtiyaclarını nasıl qarşılamaq mümkün laf etecekler.

Ukraina ve halqara uquq qorçalayıcıları Rusiyeniñ Qırım işğalinden soñ yarımadada insan aqlarına riayet etüv vaziyeti kerginleşkenini qayd ete ediler.

Rusiye akimiyeti qırımtatarlar ve Ukrainağa qoltutqan vatandaşlarğa basqı yapa.

Rusiye kontrol etken Qırım akimiyeti uquq qorçalayıcılarnıñ yarımadada insan aqlarınıñ bozulmasına dair malümatları qabartıla, dep bildire.

Ukraina Yuqarı Radası Rusiyeniñ vaqtınca Qırım işğaliniñ başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.

XS
SM
MD
LG