Link açıqlığı

Kyivde qırımtatarlar «Baar korüşüvini» keçirdiler


Kyivdeki qırımtatarlar «Baar korüşüvini» keçirdiler. Tedbir Pirogovo Ukraina halq mimarcılığı ve turmuşı muzeyinde olıp keçti, dep bildire Qırım.Aqiqat mühbiri.

Teşkilatçilardan biri Qırımtatar yaşlar merkezi Kyiv filialınıñ reisi Seit-Bekir Suleymanov böyle bir kün qırımtatarlarğa beraber toplaşmağa imkân bergenini tüşüne.

«Mında Kyivdeki qırırmtatarlarğa, ve tek qırımtatarlarğa degil, bütün istegenlerge bir yerde toplaşıp, uzun qıştan soñ bir-birini, dostlarını körmek ve yañı insanlarnen tanışmaq içün yeterli yer», – dep ayttı Suleymanov.

Tedbir çerçivesinde bayram musafirleri ve iştirakçileri qırımtatar medeniyeti ile tanıştılar: halq yırlarını diñley, qırımtatar halq oyunlarına köre ve master-klasslarda iştirak ettiler.

Bayramda Ukraina Halq artisti Femiy Mustafayev ve Qırımda nam qazanğan artist Lenara Osmanova çıqışta bulundılar.

«Nasıl olsa da, fikir ve göñlümiz Qırımda. Fikren evge, Qırımğa, ketmek ve anda böyle serbest, öz toprağımızda bayram keçirmek ister edik», – dep ayttı Lenara Osmanova.

Seit-Bekir Suleymanovnıñ aytqanına köre, «Haytarma» cemaat teşkilâtı, «Zaman» cemaat ağı, Kyiv şeeriniñ qırımtatar yaşları ve göñülliler bayramnı teşkil etmege yardım ettiler.

Rusiye Qırımnı işğal etken soñ on biñlerce insan Qırımnı terk etmege mecbur oldı, çoqusı da – qırımtatarlar.

Ukraina Yuqarı Radası Rusiyeniñ vaqtınca Qırım işğaliniñ başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.

XS
SM
MD
LG